"Хөгжлийн бэрхшээлтэй иргэдийн оролцоог хангах, үйлчилгээг сайжруулах" төслийн хүрээнд Азийн хөгжлийн банкны хөрөнгө оруулалтаар улсын хэмжээнд 6 аймагт “Хөгжлийн бэрхшээлтэй хүний хөгжлийн төв” баригдахаар болсоны нэг нь манай аймаг юм.

Энэ чиглэлээр өнөөдөр Хөгжлийн бэрхшээлтэй иргэдийн оролцоог хангах, үйлчилгээг сайжруулах төслийн дэд хорооны анхдугаар цахим нэгдсэн хурлыг хийж, санал бодлоо солилцлоо.

Энэхүү төвийг ашиглалтад оруулснаар төрөлхийн хөгжлийн бэрхшээлтэй болж байгаа шалтгааныг бууруулах, олдмол хөгжлийн бэрхшээлээс урьдчилан сэргийлэх, хөгжлийн бэрхшээлтэй хүүхэд, иргэн бүрт тохирсон сэргээн засах эмчилгээ, үйлчилгээг хүргэж, эрүүлжүүлэх цогц үйлчилгээг бий болгосноор хөгжлийн бэрхшээлтэй иргэд нийгмийн амьдралд бие даан оролцох, хөдөлмөр эрхлэх, амьдрал ахуйгаа өөрөө авч явах бусдаас хараат бус амьдрах боломжийг олгох олон давуу талтай юм.

Аймгийн нийт хүн амын 5 хувь нь буюу 4300 орчим хөгжлийн бэрхшээлтэй иргэн байна. Эдгээр иргэдээс 600 нь буюу 0,7 хувь нь 0-16 хүртэлх насны хүүхдүүд байна. Хөгжлийн бэрхшээлтэй хүүхдийн 20 хувь нь хөдөлгөөний бэрхшээлтэй /тархины саажилттай/, 12 хувь нь уналт, таталт, насанд хүрэгсдийн 0,05 хувь нь мэдрэлийн эмгэгтэй байгаа нь өндөр тоон үзүүлэлт юм. Ийм ч учраас тэдэнд орчин үеийн тоног төхөөрөмж бүхий сэргээн засах эмчилгээ, усан засал, хөдөлгөөн засал, иллэг заслын тусламж үйлчилгээг хүргэх шаардлага илүү их тулгарч байна.